الخميس، 6 يونيو 2013

                                         
                                         

                                          البنت عاوزة تحس انها مطلوبة لكن احيانا الطريقة بتخوفها





                                         الإنسان بطبيعته لما يكون محتاج ومش لاقي طريقة يسد بيها احتياجاته .. وقتها لو حد اداه قوة                          
                                         هيدوس على كل الناس .. دا اللي حصل ف الصورة .. الشباب عندهم احتياج ومفيش طريقة يسدو
                                         والمجتمع اداهم الفرصة .. ودي النتيجة







                                          احيانا بنقول الصورة وحدها تكفي








                                         



















انا مش هتكلم بالفصحى .. علشان لما نكون وصلنا لمرحلة زي دي .. ف الفصحى ملهاش مكان بينا !
ومش هتكلم بالدين .. علشان لما يكون كل واحد بيدعي انه بيصلي وف نفس الوقت بيحلل ل نفسه انه يبص على البنات ويتفرح على افلام إباحية ويشرب سجاير "اللي بقت حرام شرعاً" وغيرها زي الكحوليات وصولاً للحشيش .. يبقى اذن الكلام مش هيكون بناء على الدين
الكلام الديني سمعناه كتير ومحدش بقا بياخد بيه ووصلنا لمرحلة اننا بقينا بنمل وبنزهق .. خاصة من الشيوخ "اللي تقريبا كلهم زي بعض" اللي بيقولو الخطبة كل جمعة في كتيييييير من جوامع مصر
تقريبا كلهم على نفس النمط والمنوال .. بيستخدمو نفس الطريقة .. بيقولو نفس الكلام
احنا فين من زمان .. فين من الرسول والصحابة والتابعين .. وكلام كتير بنفس المعنى
الناس من كتر سماعها للكلام دا بدون تجديد في طريقة إلقائه .. حست بالملل منه .. ومبقاش يأثر فيهم
وعلشان الناس اللي ممكن تقولك انا بتأثر .. اللي بيتأثر دا بيكون حالة نادرة .. اصل مش من الطبيعي اني اعمل فعل معين اكتر من مرة .. واتوقع نتيجة مختلفة في كل مرة !
كدا بقا مبقاش ادامنا غير العقل والمنطق

انا حبيت في البداية اني اوصف كلامي بصور اقدر اقول انها محتشمة بالنسبة للي بيحصل على الحقيقة مرات ومرات
هو ايه اللي بيحصل طيب ؟؟!
اولا خلونا نعترف ان نسبة البنات في مصر بتزيد .. ودا بناء على احصائية كنت شوفتها ايام انتخابات مجلس الشعب .. نسبة الإناث في الجيزة كانت 48%
ثانيا نسبة الجواز كمان بتقل .. ودا ناتج من فساد كبير وإقتصاد ضعيف وفرصة عمل تقريبا نادرة
ثالثا نسبة الطلاق بتزيد .. ودا ناتج عن الجواز التقليدي او الجواز عشان سبب زي الاحتياج للفلوس وطبعا بزيادة الوعي للبنات وانها تتطالب بحقها من جوزها .. لكن برضو المجتمع قوي في قتل الحته دي .. ف انه بيخلي صورة المطلقة مش ولابد وتعامل الناس معاها زي الزفت :(
نيجي بقا لفكرة الجواز عند الراجل المصري .. الراجل بيبص للجواز على انه عادة من عادات المجتمع .. يعني لازم يتجوز عشان يكون عيلة ويكون عنده اولاد !
دا غير طبعا احتياجه للجنس .. ودا اللي بيخليه ينقي واحدة حلوة .. وبيحاول يجيبها خام بغض النظر بقا عن اللي كان هو بيعمله من علاقات شبة كاملة واحيانا كاملة قبل الجواز !
الانثى بقا .. دايما بتكون هي الطرف المنتظر .. يعني لو بنت جت قالتلي انا عاوزة اتعرف عليك .. تبقى مش محترمة .. وانا لو قبلت كدا .. ابقى واد سيس .. نظرة مجتمع ذكوري بحت :)
المجتمع المصري بيدي فرصة للشباب انهم يعملو حاجات كتير اوي بتديهم القدرة على التسلط على البنات .. بنات اصحاب ونازلين يفرحو مع بعض ف العيد .. راحو الكورنيش مثلا او وسط البلد .. وهناك شباب اتحرشو بيهم
طبعا الجملة اللي كنا سمعناها كتير .. وايه اللي وداهم هناك !!!!!!!!!!!!
مش فاهم يعني ايه الجملة ؟!!!!!!!!!!
بنات اصحاب وينزلو يفرحو مع بعض .. فيها ايه دي ..
طبعا واحد ممكن يتكلم ويقولي البنات اللي رايحين يفرحو هناك دول وانت بتقول بمنتهى السذاجة انهم ملهمش ذنب .. عارفين ان المنطقة دي فيها شباب كتير
هههههههههههههههه والله دا كلام يضحك .. يعني ايه فيها شباب كتير .. هو عشان فيها شباب يبقى ممنوع على البنات انهم يروحو هناك
طب نفرض ان معروف ان الشباب اللي هناك هيعاكسو .. وطبعا دا مش فرض .. دي حقيقة .. ومصر كلها عارفة كدا
يا ترى يا هل ترى فين الشرطة ؟؟؟!!!!!
يعني مكان الجريمة معروف .. ووقت الجريمة معروف .. فاضل ايه بقا يا ترى علشان يكون في امان ؟
طبعا محتاج احط مليون علامة استفهام
المهم ما علينا ..
كلنا بقا مخلوقين عندنا إحتياج جنسي .. وخاصة الرجل ودا بقا اللي بيخليه يفكر في الجواز والعلاقات قبل الجواز .. والبنت بما انها الطرف المنتظر .. وبحكم احتياجها هي كمان .. ف كتير منهم بيوافق .. الا نادراً بصراحة
وانا مش بحس ان دا دليل على الإحترام او لأ .. انما هي التزام بقيود مجتمع ليس إلا
ومع إختلاف نظرة المجتمع بتختلف معايير الإحترام
ونخلينا في المجتمع المصري ..الراجل عنده احتياج جنسي .. والأنثى عندها احتياج جنسي
الراجل بيلجأ انه يصاحب بنات ويعمل معاهم علاقات كاملة او شبة كاملة .. او بيلجأ للتحرش والمعاكسة
الست بقا بتلبس لبس مثير عشان تدفع الشباب بمعاكستهم بحكم انها من طبيعتها بتبقى عاوزة تحس انها مطلوبة .. عاوز تحس انها ملكة
مع اني بحس ان الرجالة كدا برضو .. بس هم بيحبو كدا .. ايه القمر دا .. وحشتيني جدا .. بحبك اوي .. مش عارف من غيرك كنت هعمل ايه .. وكلام يحسسها بجمالها وانها فعلا حاجة غالية عند حبيبها او جوزها او صديقها
إذن كلنا متفقين على ان دا احتياج ولابد منه .. طبعا ناس كتير هتقول بس دا غلط واحنا مش لازم نعمل كدا
بلاش نضحك على بعض .. تقريبا معظمنا بيعمل كدا .. بنعاكس وبنصاحب وبنقول كلام معسول .. ونفس الحكاية للبنات
احنا كل اللي بنعمله اننا بنتظاهر بالمباديء وبنعمل عكسها !!
..
المشكلة بقا ان في ناس كتيرة بتروح ف الرجلين .. وبما اننا مجتمع ذكوري ف إذن اللي بيتهان هي الست
الأنثى بتتداس علشان ضعيفة ولسه مقدرتش توصل لحقها ..
بس انا مش شايف الانثى ضعيفة اوي يعني .. لو بصينا على الستات المتجوزين هنلاقيهم بيأثرو كتير في قرارات ازواجهم ..
ودا دليل على ان الانثى لو قدرت تلاقي نفسها هتقدر يكون لها قرار خاص بيها وهيكون لها تأثير على اللي حوليها
لانها لما بقت زوجة .. وقتها بقا ليها حق التدخل في امور حياتها المشتركة مع جوزها .. ووقتها بيبدأ يسمع منها وبيكون لها تأثير :)
لكن اغلب البنات مش واخدين حقهم .. ومع الإحتياج الجنسي للشباب وقلة نسبة الجواز .. دا أدى للتحرش
لكن ذنبهم ايه البنات اللي مبيكونش ف دماغهم المعاكسة والمصاحبة والكلام دا ؟
كتير اوي من البنات اتحرش بيهم .. ومنهم اللي فقدت عذريتها .. ومنهم اللي انهارت نفسياً وحتى الآن لسه بتعاني من التواصل مع الرجالة عموماً
البنت ممكن يرجعلها حقها بنفسها .. بقدراتها ومطالبتها بحقوقها وفي يوم من الايام هتقدر
او ان الراجل هو اللي يجيبلها حقها او يساعد ف دا .. ولو الراجل فعلا عمل كدا هيكون معناه ضعف الانثى مع ثقتها في راجل معين انه يجيبلها حقها وبعدها هي هتكتسب الثقة منه
وبما اننا في مجتمع ذكوري بيخدم الرجال .. ف هيكون صعب جدا تلاقي راجل يدافع عن حقوق المرأة .. اللي ممكن وقتها تبقى اعلى منه وبالتالي كلمته هتهتز وهتقل قوتها وتأثيرها
ف معظم الرجالة هتقول "وعلى ايه .. خلينا كدا احسن"
انا بطالب بحقوق المرأة لأنها ببساطة إنسانة .. كائن حي .. له حقوق وواجبات وكرامة .. له طموح وأحلام وأهداف
وعلشان كدا بقدم خطابي لكل بنت اتحرش بيها او تمت معاكستها .. انتي قوية بذاتك .. وهتكوني قوية اكتر مع بنات زيك بإتحادكم مع بعض .. وهتكوني أقوى لما يستوعب الرجال كدا .. ويبقى لكل واحد حقوقه وواجباته :)


هناك 8 تعليقات:

  1. مقال اكثر من رائع

    ردحذف
  2. الفكره رائعه

    مقدمة المقال تكون صور معبره .. بالعاميه كده .. بتتكلم لوحدها

    سلس .. بسيط حد التعقيد

    تحياتي

    ردحذف
    الردود
    1. لكن للاسف الفكرة من نبض الواقع
      اتمنى الواقع يتغير للافضل :)

      حذف
  3. مقال جامدة جدا و ده فعلا اللى بيحصل وللاسف مجتمعنا عايش فى جهل وحيوانية من زمان وصعب تيجى تقوله غير القيم ده بين يوم وليلة لازم تهيئة

    ردحذف
  4. أ/ محمد رومـآ كلآآآم جــآي في وقــته ..
    والمــوضوع ده بئي قلق كل البنــآت بالذآت المحترمه الي مبتكـونشي استفزت الولد ولابسه محتشم بيضايقهـآ زي الصور الي حضرتك حـآطهـآ ..

    وللأسف آنـآ شخصيـآ بيحصل معـآيـآ كده :(

    ربنـآ يهديـهم .. وتحيه ليك كشـآب على المقـآل ده ..

    يـآريت يوصل للشبـآآآآآآب ..

    دمت بسعــآده

    إيمــآن

    ردحذف
    الردود
    1. الشباب في حد ذاتهم المجتمع هو اللي مديهم الفرصة دي
      ودا بدأ يتغير
      بان ناس كتير بدأت تبص على الافعال دي كنوع من عدم حرية الرأي والتعدي على الغير
      ودا هيتغير اكيد وقريب كمان :)

      حذف